Gure ametsa izango litzateke Atxondoko bailara baratze agroekologiko txikiz betetzea. Biodinamikaren eta animali trakzioaren laguntzaz, bertako biztanleen fruta, barazki eta senda belar guztiak asetzeko gai izatea. Soberakinak biltzeko eta eraldatzeko gune komunitario bat izatea, eta erle, behi, ahuntz, ardi eta landareekin lan egiten dituzten aliatuak izatea… benetako iraunkortasun material eta emozionalerantz bidea eginez.
Lurra laztantzeko agroekologia, nekazaritza biodinamikoa eta animali trakzioa besarkatzen ditugu…
2007tik nekazaritza ekologikoan ziurtatuta gaude, baina zigiluak baimendutako botika edo produktu gehienak ere ez ditugu erabiltzen, ezta lurrarekin oldarkorrak diren teknika ez plastikorik ere ez…
Baratza lantzeko, Biodinamikaren printzipioei jarraitzen diegu, ahal den neurrian, Rudolf Steinerrek aldarrikatzen zuen baserri-organismoan sinetsita.
2012tik animali trakzioarekin lan egiten dugu.
Gure ametsa, inguruko pinu-landaketen ordez Atxondoko bailara baso jangarriz betetzea izango litzateke. Mundu osoko espezieak dituzten basoak, “autoktonoa” existitzen ez delako. Askotariko espezieak dituzten basoak, biodibertsitatearen aberastasunean eta erresilientzian sinesten dugulako, ez monolaborantzan. Baso jangarriak ditugu amets: zuhaitz handiak, ertainak eta txikiak, belarkara iraunkorrak eta urterokoak, tuberkuluak eta sustraiak, landare igokariak, onddoak.. dituzten basoak. Hainbat aprobetxamendu materialetarako landareak, hala nola egurra, janaria, botikak, ehunak, erretxinak eta argizariak, tinduak, landare meliferoak eta biodibertsitate-babeslekuak, loreak… gozamenerako eta arima elikatzeko basoak…
Gurea basoa gaztea da, xumea eta apala.
2008an landatu genituen lehen fruitu-arbolak, hainbat ikastaro eta nekazaritza eskoletatik igaro ondoren. 2010-2012 urteetatik aurrera biodinamika eta permakulturaren ikuspegiak iritsi ziren gure bizitzara, eta gure begirada eta lurra laztantzeko era aldatzen hasi zen…
Ez genuen gehiago “ekoizle” edo “ustiapen” izan nahi… lurra laztandu, zaindu eta errespetatu nahi genuen, bere erritmoak eta sasoiak errespetatuz…
Zerua eta lurra konektatzen dituen leku baten ametsarekin hasi ginen…
Urtero landatzen ditugu zuhaitzak Biezkon, poliki-poliki, presarik gabe. Naturari bere erritmoekin adierazten lagunduz, egunen batean, bailara begiratu daitekeen ispilu izateko…
